सुनसरी, असार १८ गते ।
सुनसरीको दुहवी नगरपालिका-१२ बाट जुवा खेलिरहेको अवस्थामा ५ जना पक्राउ परेका छन् । स्थानीय गंगा चौधरीको घरमा जुवा खेलिरहेको भन्ने सूचनाका आधारमा जिल्ला प्रहरी कार्यालय सुनसरीवाट खटिएको प्रहरी टोलीले ईटहरी उप-महानगरपालिका-१५ का ४४ बर्षीय श्रवण कुमार चौधरी, ग्रामथान गाउँपालिका-६ का ४० बर्षीय रुपेश कुमार तामाङ, ग्रामथान गाउँपालिका-५ का ४० बर्षीय लाल बहादुर चौधरी, गढी गाउँपालिका-३ का ४२ बर्षीय रमेश चौधरी र ३९ बर्षीय जोगेन्द्र उरावलाई पक्राउ गरेको हो ।
जुवाको खालबाट प्रहरीले १६ थान कौडा, गलैचा-१ थान, कालो कपडा १थान र नगद २ लाख ८५ हजार १ सय १४ रुपैयाँ समेत बरामद गरेको छ । पक्राउ परेकाहरुको सम्बन्धमा थप अनुसन्धान भइरहेको जिल्ला प्रहरी कार्यालय सुनसरीले जनाएको छ ।
