विराटनगर । जिल्ला प्रहरी कार्यालय मोरङका प्रहरी निरीक्षकको सम्पर्क पहिचानमा पर्नु भएका मोरङ अदालतका एक जना न्यायाधीशलाई कोरोना संक्रमण पुष्टि भएको छ । कोशी अस्पतालको ल्याबमा स्वाब परीक्षण गर्दा न्यायधिशमा कोरोना संक्रमण पुष्टि भएको हो ।
अदालतमा सूचना अधिकारी युवराज पौडेलका अनुसार न्यायधिशसहित चारजनाको स्वाब संकलन गरिएको थियो । जिल्ला प्रहरी कार्यालय प्रहरी निरीक्षकमा संक्रमण पुष्टि भएपछि उहाँको सम्पर्कका आधारमा अदालतका चारजनाको स्वाब संकलन गरिएको हो ।
न्यायधिशमा कोरोना संक्रमण पुष्टि भएपछि सोमबारदेखि तीन दिनको लागि अदालत बन्द गरिएको सूचना अधिकारी पौडेलले जानकारी दिनुभयो ।
अदालत पूर्ण रूपमा बन्द गरि सेनिटाइज गरिनेछ र सेवाग्राहीका लागि सुरक्षित स्थल बनाएपछि मात्रै अदालतको काम सुचारु हुने भएको छ । नियमित मुद्दाका सुनुवाई स्थगित समेत भएका छन् । जिल्ला अदालत मोरङमा १२० कर्मचारी ४० जना कन्ट्याक्ट ट्रेसिङमा परेका हुन् ।
