विराटनगर । कोरोना संक्रमितका लागि चिकित्सकले सिफारिस गर्ने इन्जेक्सन रेम्डिसिभरको विराटनगरमा सहज उपलब्ध गराउन थालिएको छ । विराटनगरस्थित हाम्रो अस्पताल प्रा.लि.बाट इन्जेक्सन रेम्डिसिभर सहज रुपमा उपलब्ध गराउन थालिएको हो ।
औषधी व्यवस्था विभागले तोकेको मूल्य ४९०० सय रुपैँयामा हाम्रो अस्पताल प्रा.लि.मा इन्जेक्सन रेम्डिसिभर उपलब्ध हुन थालेको छ । यसको जानकारी औषधी व्यवस्था विभाग विराटनगर कार्यालय र औषधी व्यवसायी संघले समेत आधिकारिक रुपमा गराएका छन् ।
अस्पतालमा भर्ना भएका संक्रमितका लागि चिकित्सकको सिफारिस अनुसार लगाईने इन्जेक्सन रेम्डिसिभर फार्मेसीहरुमा सहज उपलब्ध नहुँदा आफन्तहरु भौतारिनु पर्दै आएको थियो ।
औषधी व्यवस्था विभाग विराटनगरले सरकारी मूल्यमा सहज रुपमा हाम्रो अस्पताल प्रा.लि.बाट रेम्डिसिभरको बिक्री वितरण हुने जानकारी गराएको छ । औषधी प्राप्ती गर्नका लागि अस्पतालको सिफारिस पत्र, बिरामी पूर्जा, कोरोना संक्रमण पु्ष्टि भएको रिपोर्ट र बिरामीको परिचयपत्र प्रतिलिपी आवश्यक पर्नेछ । औषधी व्यवसायी संघ र औषधी व्यवस्था विभागले दलालको फन्दामा नपरी बिरामीका आफन्तले सोझै हाम्रो अस्पताल प्रा.लि. विराटनगर एयरपोर्टमोड नजिकमा सम्पर्क गर्न सार्वजानिक रुपमा सूचित गराएका छन् ।
