विराटनगर । कोशी अस्पतालका स्वास्थ्यकर्मीमाथि कुटपिट भएको भन्दै चिकित्सक तथा स्वास्थ्यकर्मीहरु आन्दोलित भएका छन् ।
कोरोना संक्रमणको बेला सुरक्षाको जिम्मेवारीमा बसेका प्रहरीले स्वास्थ्यकर्मीमाथि अन्धाधुन्ध लाठी प्रहार गरेको भन्दै उनीहरु आन्दोलित भएका हुन् । नेपाल चिकित्सक संघ कोशीको अगुवाईमा बुधबार अस्पताल परिसरमा प्रहरीले ज्यादती गरेको भन्दै चिकित्सक तथा स्वास्थ्यकर्मीले सुरक्षाको माग गरेका हुन् ।
संघका कोशी अध्यक्ष डा.फरवार्ड सिलवालले ज्यान बचाउन खटिने स्वास्थ्यकर्मीमाथि सुरक्षा दिन बसेका प्रहरीले अमर्यादित तवरले कुटपिट गर्नु गम्भीर विषय भएको बताउनुभयो ।
कुन अवस्थामा आईरहेको व्यक्ति हो भनेर सामान्य सोधपुछ र पहिचान लिनुपर्दथ्यो, संघका अध्यक्ष सिलवालले भन्नुभयो–त्यसरी अन्धाधुन्ध लाठी बर्साएर तर्साएरपछि निर्वाध रुपमा काम गर्न सकिदैन । चिकित्सक तथा स्वास्थ्यकर्मीले सुरक्षा माग गर्दै जिल्ला प्रशासन कार्यालय र जिल्ला प्रहरी कार्यालयमा समेत ध्यानाकर्षण गराउने भएका छन् ।
उनीहरुले लाठी हान्ने प्रहरीलाई तत्काल कारवाहीको प्रक्रिया बढाउनु पर्ने माग समेत गरेका छन् । मोरङ प्रहरीले घटनाको अनुसन्धानका लागि छानविन समिति बनाउने र डिउटीबाट कुटपिटमा संलग्न प्रहरीलाई हटाउने भएको छ ।
