विराटनगर । धरान भेडेटार सडक खण्ड अन्तर्गत धरान–४ स्थित नौकिलो भन्ने स्थानमा एक पुरुषको जेब्रा झोलामा खुट्टा र टाउको फेला परेको छ ।
हत्या गरी शवको खुट्टा र टाउको जेब्रा झोलामा हालेको अवस्थामा बुधबार दिउसो फेला परेको ईलाका प्रहरी कार्यालय धरानका डिएसपी नरेन्द्र कुवँरले आवर विराटनगरलाई जानकारी दिनुभयो । डिएसपी कुवँरका अनुसार घटनाको प्रकृति हेर्दा हत्या गरी फालेको हुन सक्छ । अहिले प्रारम्भीक रुपमा तत्काल शवको पहिचान गर्न अलिक समस्या देखिएको छ । यसको लागी हामीले घटनाको विषयमा सङ्घीय प्रहरी कार्यालय धरानको तालिम प्राप्त कुकुर पनि लगेर अनुसन्धान गरेका छौँ ।
स्थानिय खड्गबहादुर तामाङ र उनको पत्नी दाउरा खोज्न जङ्गल जाँदा देखेपछि प्रहरीलाई खबर गरेका थिए । धरान–१६ मा अस्थायी रूपमा बस्दै आएका प्रत्यक्षदर्शी तामाङका अनुसार जेब्रा झोलामा फालेको अवस्था देखेपछि प्रहरीलाई खबर गरेका थिए । करिब ४० देखि ४२ वर्ष उमेर रहेको प्रहरीले अनुमान गरेको छ । धरान–१३ स्थित जीरोपोइन्टबाट करिब ९ किलोमिटर उत्तर धरान–भेडेटार सडक खण्डको नौकिलो भन्ने स्थानमा जङ्गलमा शव फेला परेको हो ।
भेटिएको शव विपि प्रतिष्ठानमा पोष्ठमार्टमको लागी लगिएको ईलाका प्रहरी कार्यालय धरानले जनाएको छ ।
