संखुवासभा । संखुवासभाको मादीबाट झापाको दमक जाँदै गरेको यात्रुबाहक बस दुर्घटनामा मृत्यु हुनेको संख्या १४ पुगेको छ ।
बिहीबार विहान करिव ७ बजे मादी नगरपालिका–६ को पुलुड्ड स्थित सात घुम्तीमा दुर्घटना दुर्घटना हुँदा १४ जनाको मृत्यु भएको हो । ना ४ ख ७३५ नम्बरको बस सडकबाट करिब ३ सय मिटर तल खसेर दुर्घटना भएको संखुवासभा प्रहरी प्रमुख डिएसपी लालध्वज सुवेदीले जानकारी दिए ।
अहिलेसम्म दुर्घटनामा मृत्यु भएका १४ जनाको शव निकालिएको डिएसपी सुवेदीले जानकारी दिए । उनका अनुसार मृतकको पहिचान भने भएको छैन । दुर्घटनामा पाँच जनाको जिवितै उद्धार गरिएको छ ।
घाइतेहरुको उपचारका लागि चैनपुर अस्पताल ल्याइएको छ । ज्यान गुमाएकाहरुको शव पनि पोष्टमार्टमका लागि चैनपुर अस्पताल नै ल्याइएको छ । बसमा सवारहरुको विवरण नभएकोले दुर्घटनामा पर्नेहरुको खोजी भइरहेको जिल्ला प्रहरी कार्यालयले जनाएको छ । अहिले पनि उद्धार कार्य जारी रहेको सुवेदीले जानकारी दिए ।
