दाङ । बिमा रकमको लोभमा परी दाङको घोराहीमा चार दलद्वारा आह्वान गरिएको बन्दको मौका छोपी चालक र सहचालकले आफ्नै टिप्परमा आगो लगाएका छन् ।
चालक आफैंले आगजनी गरेको पुष्टि भएपछि प्रहरीले चालक र सहचालकलाई नियन्त्रणमा लिएको छ । घोराही-लमही सडकखण्डको बबई खोला पुलमा रा १ ख १६९४ नम्बरको टिप्परमा आगो लगाइएको प्रहरीले जनाएको छ ।
विभिन्न चार राजनीतिक दलले आह्वान गरेको बन्दको मौका पारी मंगलबार बिहान गाडीमा आगजनी भएको देखेपछि चालक अरुण चौधरी र सहचालक आकाश चौधरीलाई नियन्त्रणमा लिइएको जिल्ला प्रहरी कार्यालय दाङले जानकारी दिएको छ ।
उनीहरूलाई नियन्त्रणमा लिएर अनुसन्धान गर्दा टिप्परका मालिकको सहमति अनुसार बिग्रेको टिप्परमा आगजानी गरेको पुष्टि भएको प्रहरीले जानकारी दिएको छ । टिप्पर मालिकको पनि खोजी भइरहेको प्रहरीले जनाएको छ । बिमा रकमको पाउने लोभमा बिग्रेको टिप्परमा आगजनी गरेको देखिएको प्रहरीले जानकारी दिएको छ ।
