इनरुवा, ३१ जेठ : पहाडी जिल्लाहरूमा केही दिनदेखि परेको वर्षाका कारण सप्तकोसी नदीमा यो वर्षकै उच्च पानीको बहाव मापन गरिएको छ । सामान्य अवस्थामा प्रतिसेकेण्ड ५० देखि ८० हजार क्युसेक रहने पानीको बहाब आज १ लाख ५२ हजार ७ सय ५० क्युसेक मापन गरियो । तर दिउँसोबाट बहावमा कमी आएको छ । पानीको बहाव दिउँसो ९३ हजार क्युसेक प्रतिसेकेण्डमा झरेको छ । वर्षा सुरु भएसँगै कोसीमा पानीको बहाव बढेपछि आसपासका बासिन्दा त्रसित भएका छन् ।
