बिराटनगर असार १७
सुनसरीस्थित सप्तकोशी नदीमा पानीको बहाव यो बर्षकै उच्च पुगेको छ । नदीमा पानीको बहाव उच्च भएसंगै गएराती व्यारेजमा खतरा स्वरुप रातो बत्ती बालेर एकतर्फी सवारी संचालन गरिएको थियो । नदीमा प्रतिसेकेण्ड १ लाख ५० हजार क्युसेक पानी नाघेपछि खतरा मानिदैं आएको छ ।
यसैबिच आज बिहान गरिएको मापन अनुसार भने नदीमा पानीको बहाव केही घटेको छ । पूर्वी पहाडी जिल्लाहरुमा लगातार बर्षा हुन थालेपछि नदीमा पानीको बहाव बढ्ने क्रम जारी रहेको छ । उता, कोशी पीडित संघर्ष समितिले भने सप्तकोशीमा बाढी आउंदा समेत भारतले कोशी व्यारेजका सबै ढोका नखोल्दा बर्षादको तीन महिना त्रासमा बस्नु परेको भन्दै व्यारेजको सबै ढोका खोल्न भारत सरकारसंग आग्रह गरेका छन् ।
