विराटनगर । मापदण्ड तोकिएको उमेर समूहका नागरिकका लागि पर्याप्त खोप उपलब्ध नगराएको भन्दै विराटनगर–९ नम्बर वडाले खोप लगाउने कार्यक्रम बहिष्कार गरेको छ । महानगरपालिकाले कोटा अनुसारको खोपको डोज उपलब्ध नगराउँदा नागरिकलाई समस्या परेको भन्दै खोप कार्यक्रम नै बहिष्कार गरिएको हो ।
महानगरले ९ नम्बर वडालाई जम्मा ११९ डोज खोप मात्रै उपलब्ध गराएको वडा अध्यक्ष विश्वनाथ भगतले जानकारी दिनुभयो । महानगरले ६२ वर्ष भन्दा माथिका नागरिकलाई खोप लगाउने तयारी गरेको थियो । त्यस बाहेक फ्रनटलाइनलाई समेत खोप उपलब्ध गराउनुपर्ने थियो ।
विराटनगर महानगरको ९ नम्बर वडामा बुधबार बिहानैदेखि खोप लगाउन भीडभाड भएका बेला महानगरले जम्मा १७ डोज खोप मात्रै पठाएपछि कसलाई लगाउने कसलाई नलगाउन भन्दै वडा अध्यक्ष भगतले खोप कार्यक्रम नै स्थगित गरेका हुन् ।
मंगलबार १०२ डोज खोप पाएको वडाले बुधबार १७ डोज मात्रै पाएको थियो । खोप लगाउन आउने नागरिक उतिकै भएकोले महानगरको खोपले नपुग्ने भएको हो । यता महानगरका प्रमुख प्रशासकिय अधिकृत उमेश बस्नेतले जिल्ला प्रशासन कार्यालय मोरङसँग थप खोज डोज उपलब्ध गराउन पत्राचार गर्नु भएको छ । महानगरमा जम्मा ३ हजार ५४८ डोज खोप मात्रै उपलब्ध भएकोले त्यसको थप ५० प्रतिशत खोज डोज उपलब्ध गराईदिन माग गरिएको हो ।
