सामाजिक सुरक्षा कोषको हालको व्यवस्थाहरुमा असहमती जनाउदै विराटनगरमा आज प्रदर्शन भएको छ । कोषका विरुद्ध विराटनगरस्थित नेपाल एसबीआई बैंक लिमिटेडका कर्मचारीहरुले आज विरोध प्रदर्शन गरेका हुन् । विराटनगरको हिमालय रोडमा अवस्थित बैंकका कर्मचारीहरुले कार्यालय समय अघि कोष योजनाको विरुद्धमा नाराजुलुस गर्दै प्रदर्शन गरेका थिए ।
सामाजिक सुरक्षा कोष विरुद्ध नेपाल भरका बैंक तथा वित्तीय संस्थाका कर्मचारीहरु केहि समययता आन्दोलित छन् ।
आफुहरुले खाईपाई आएको सेवा सुविधासमेत खोसिने गरी कोषमा आवद्ध गराउन लागिएको भन्दै वित्तीय क्षेत्रका कर्मचारीहरु असन्तुष्ट भएका हुन् ।
कोषले असार मसान्तभित्र आवद्ध हुन सार्वजनिक सूचना निकालेपछि कर्मचारीहरुले आन्दोलनका कार्यक्रम नै सार्वजनिक गरेर प्रदर्शन सुरु गरेका छन् ।
