विराटनगर।
झापाको छुट्टा छुट्टै स्थानबाट प्रहरीले लागूऔषध (ब्राउन सुगर) सहित ३ जनालाई पक्राउ गरेको छ । पक्राउ पर्नेमा पाँचथर फिदिम नगरपालिकाका २७ बर्षीय रोशन सुबेदी, २८ बर्षीय सुमन कार्की र भारत दार्जिलिङका २४ बर्षीय रतन सिंह रहेका छन् ।
अस्थाई प्रहरी पोष्ट बसपार्कबाट खटिएको प्रहरी टोलीले हिजो बेलुका साढे ८ बजे अर्जुनधारा नगरपालिका ११ बसपार्क स्थित एक होटलबाट रोशन सुबेदी र सुमन कार्कीलाई ६ ग्राम ७०० मिलि ग्राम ब्राउन सुगर सहित पक्राउ गरेको हो ।
त्यसैगरी हिजो दिनको साढे २ बजे लागूऔषध नियन्त्रण व्युरो काकडभिट्टाबाट खटिएको प्रहरी टोलीले सिंहलाई मेचीनगर नगरपालिका ६ स्थित तुर्केनी खेल मैदान छेउबाट ५ ग्राम ब्राउन सुगर सहित पक्राउ गरेको हो ।
साथै पक्राउ परेका तिनै जना उपर प्रहरीले थप अनुसन्धान गरिरहेको प्रदेश १ प्रहरी कार्यालय विराटनगरले जनाएको छ ।
