विराटनगर । अत्याधिक वर्षाका कारण विद्युत प्राधिकरणको दुहबी ग्रिड शाखा जलमग्न भएसँगै मंगलबार रातीदेखि अवरुद्ध भएको विद्युत बिहीबारदेखि मात्र आपुर्ति हुने भएको छ ।
मौसम अनुकुल भए आवश्यक मर्मत गरेर बिहीबारदेखि पुनः विद्युत आपुर्ति गर्ने तयारी रहेको नेपाल विद्युत प्राधिकरणको विराटनगर वितरण केन्द्रले जनाएको छ । बर्षातको पानी कन्ट्रोल रुममा पसेपछि मंगलबार रातीदेखि दुहबी ग्रिड शाखाले विद्युत आपुर्ति रोकेको थियो । अन्य क्षेत्रका प्रसारण लाइनमा समेत क्षति पुगेपछि मंगलबार रातीदेखि प्रदेशभरिमा विद्युत आपुर्ति हुन सकेको छैन् । दुहबी ग्रिडले प्रदेशका अन्य सब–स्टेशनहरुलाई पनि विद्युत आपुर्ति गर्नुपर्ने भएकाले अवरोध समाप्त पार्न धमाधम काम गरिरहेको छ । मौसमले साथ दिए बिहीबार साँझबाट विद्युत आपुर्ति गर्ने तयारी रहेको विराटनगर वितरण केन्द्रका सुचना अधिकार भरत केसीले बताउनुभयो ।
१८ वटा वितरण शाखा रहेको नेपाल विद्युत प्राधिकरणको प्रदेश १ मा ६ लाख ८२ हजार ८ सय ८९ सेवाग्राही छन् । प्राधिकरणको विराटनगर वितरण केन्द्रले मात्रै विराटनगर महानगरपालिका, कटहरी गाउँपालिका, ग्रामथान गाउँपालिका, बूढीगङ्गा गाउँपालिका र जहदा गाउँपालिमा अवस्थित सब–स्टेशनबाट दैनिक ७४ हजार घरधुरीलाई नियमित विद्युत आपुर्ति गर्दै आएको छ ।