विराटनगर । प्रधानमन्त्री पुष्पकमल दाहालले सातै वटा प्रदेशका मुख्यमन्त्रीहरूलाई सर्वदलीय बैठक बसेर प्रहरी समायोजन प्रक्रिया टुंग्याउने आश्वासन दिएका छन् ।
अन्तर प्रदेश मुख्यमन्त्रीहरूको हेटौडामा शुक्रबार सम्पन्न बैठकपछि प्रदेशलाई अधिकार सम्पन्न बनाएर संविधानको पूर्ण कार्यान्वयनका लागि प्रधानमन्त्री दाहाललाई उनीहरूले शनिबार ध्यानाकर्षण पत्र बुझाएका हुन् ।
प्रधानमन्त्री दाहालले गृहमन्त्री नारायणकाजी श्रेष्ठको उपस्थितिमा मुख्यमन्त्रीहरूलाई तत्काल सर्वदलीय बैठकले प्रहरी समायोजन प्रक्रिया अघि बढाउने प्रतिबद्धता जनाएका छन् ।
निजामती ऐन निर्माण प्रक्रिया अघि बढाउने र प्रदेश सरकारलाई अधिकार सम्पन्न बनाएर संविधान पूर्ण कार्यान्वयन गर्ने विषयमा प्रधानमन्त्री दाहालले प्रतिबद्धता जनाएको कोशीका मुख्यमन्त्री केदार कार्कीले बताएका छन् ।
मुख्यमन्त्रीहरूको बैठकले शुक्रबार ९ बुदे साझापत्र सार्वजनिक गरेर शनिबार प्रधानमन्त्री दाहाललाई ध्यानाकर्षण पत्र बुझाएका थिए ।
