विराटनगर । झापाको सुरुङ्गामा चारवर्ष अगाडी भएको एउटा दुर्घटनामा संलग्न चालकलाई नौवर्ष कैद र ६० हजार रुपैँया जरिवानाको फैसला भएपछि परिवारको बिचल्ली भएको छ । २०७७ फागुन १९ गते तीनवटा सवारी एक आपसमा ठोकिदाँ दुईजनाको मृत्यु र दुईजना घाईते भएका थिए । प्र १–०४–००१ च ०१६७ कार, को १ क १६८४ नम्बरको ट्रक र प्र.०१–०१–०१३ प १७८३ नम्बरको मोटरसाइकल एक आपसमा ठोकिएको थियो । त्यस क्रममा कारका सवार दुईजनाको मृत्यु भएको थियो । मोटरसाइकलमा सवार घाईते भएका थिए ।
रिजालको ग्यास उद्योगको ट्रक चालक विराटनगर–१५ का प्रेम वाइवा सवारी ज्यान तथा अंगभंग कसूरमा दोषी ठहर भएपछि उनलाई झापा जिल्ला अदालतले नौवर्ष कैद र ६० हजार जरिवानाको फैसला सुनाएको थियो । २०८० मंसिर २८ गतेको फैसला अनुसार वाइवा अहिले कैद भुक्तान गरिरहेका छन् । विभिन्न रोगले ग्रसित वाइवा कारगारमा रहेका कारण यता परिवारको दैनिकी भने कष्टकर भएको गुनासो गरेका छन् ।
बिहीबार नेपाल पत्रकार महासंघ मोरङमा पीडित बनेको परिवारले पत्रकार सम्मेलनको आयोजना गरेर उद्योगमा कार्यरत मजदुर कारागारमा हुँदा उद्योगीले गर्नुपर्ने व्यवहार राम्रो नभएको गुनासो गरेका छन् । विराटनगरका उद्योगी नविन रिजालको उद्योगले उत्पादन गरेको ग्यास लिएर झापा जाने क्रममा उनको दुर्घटना भएको थियो । सवारी ज्यान तथा अंगभंगमा चलेको मुद्दामा अदालतले गरिदिएको फैसलाले परिवारको बिचल्ली भएको श्रीमती तारा वाइवाले गुनासो गरिन् ।
दुई छोरीसहित आमाले पत्रकार सम्मेलनको आयोजना गरी उद्योग सञ्चाालकले समेत मासिक दश हजार दिदैं आएको रकम रोकिदिएको गुनासो गरेका छन् । उद्योगको कामदारको रुपमा रहेको एकजना व्यक्ति फस्दा उनको कानुनी प्रतिरक्षा समेत कमजोर भएका कारण अदालतले दोषी ठहर गरिदिएको उनीहरुको गुनासो छ । लामो समयसम्म कारागार बस्नुपर्ने स्थिति देखिएकोले परिवारले सवारी ज्यान कसूरलाई आममाफी गरिदिन माग गर्दै राष्ट्रपति कार्यालयमा समेत बिन्तीपत्र चढाएको बताए । तर, उनको कैद छुट भएन ।
पीडित परिवारका अनुसार दुर्घटनामा घाईतेका परिवारको जाहेरीले कसूर ठहर भएको हो । घाईतेले पाउनु पर्ने क्षतिपूर्ति अझै पाएका छैनन् । घाईतेका परिवारले ६० लाख रुपिँया क्षतिपूर्ति मागेका थिए । उद्योग प्रशासनले २९ लाख क्षतिपूर्ति दिने सहमति गरेपनि अहिलेसम्म नदिएको बताइएको छ । तर, पीडित परिवारले भने उद्योगको मजदुरको रुपमा रहेको घरको अभिभावक कैदी भएर बस्नु पर्ने स्थिति पनि उद्योगकै कारणले आएकोले मासिक पाउँदै आएको तलव उपलब्ध गराउनु पर्ने माग गरेका छन् । वाइवालाई उद्योगले मासिक १८ हजार मात्रै दिएर काम लगाउँदै आएको थियो ।
