विराटनगर । विराटनगरको पुष्पलालचोकस्थित घिनाघाटमा शिवगंगा आरती शुभारम्भ गरिएको छ ।
वैदिक एवं सनातन परम्परा अनुसार शुरु गरिएको आरतीमा उल्लेख्य संख्याका सर्वसाधारणले सहभागिता जनाएका छन् ।
विराटनगर महानगरपालिकाको पुर्वी सिमाना भएर बग्ने विराटनगर १९ को घिनाघाटमा साउन ७ गते साँझबाट शिवगंगा आरती शुभारम्भ गरिएको छ । साउन महिनाको पहिलो सोमबारको साईत पारेर महानगरको उत्तर पुर्वी सिमाना घिनाघाटमा रहेको पुलभन्दा दक्षिणतर्फको खोला किनारमा आरती शुभारम्भ गरिएको हो ।
वैदिक सनातन धर्म संस्कृति संरक्षण अभियान नामक प्रस्तावित समितिले सो ठाउँमा आरती शुरु गरेको हो । विराटनगरमैं पहिलोपटक शुरु गरिएको शिवगंगा आरती हेर्न उल्लेख्य संख्यामा विराटनगरवासीको भीड देखिन्थ्यो । अत्यधिक भीड भएपछि नजिकैको पुल तथा खोलापारीबाट समेत महाआरती नियालेका थिए । आरती शुरुगर्न प्रस्तावित समितिका २१ जना पदाधिकारीहरु निरन्तर १ महिनासम्म खटिएका थिए भने आरतीगर्ने बटुकहरुलाई १७ दिने प्रशिक्षण दिईएको थियो । बनारसबाट प्रशिक्षित झापाका पण्डितद्वय पुण्य गौतम र पण्डित तुलसी खतिवडाले आरतीका निम्ति स्थानीय बटुकहरुलाई प्रशिक्षण दिनुभएको जनाईएको छ । प्रत्येक सोमबारका दिन आरतीलाई निरन्तरता दिईने आयोजक अभियानका संयोजक ईश्वर खतिवडाले जानकारी दिनुभयो ।
आरती शुभारम्भको क्रममा सबभन्दा पहिले स्वस्तिवाचन,मंगलाचरण र कर्पुरबाट आरती गरिएको थियो भने त्यस लगत्तै दिप आरती र शिव ताण्डव स्त्रोत गाइएको थियो । आरती समापनसंगै प्रसाद समेत वितरण गरिएको थियो । सनातन धर्ममा गंगा आरती अनादिकालदेखी चलिआएको श्री लक्ष्मीनारायण मन्दिर पाञ्चालीका पीठाधिश स्वामी अच्यूत प्रपन्नाचार्यले जानकारी दिनुभयो । उहाँले जीवनमा जलको महत्व सर्वोपरी रहेको बताउनुहुँदै शुरु गरिएको आरतीका कारण खोला सफाईमा समेत सहयोग मिल्ने बताउनुभयो ।
