भोजराज श्रेष्ठ
धरान/धरानमा केही दिन यतादेखि चक्कू देखाएर एक युवाले चटपटेवालाहरुसँग फिल्मीशैलीमा लुटपाट गर्ने गरेको पाइएको छ ।पछिल्लो १० दिनयतादेखि धरानका विभिन्न स्थानमा ठेलामा राखेर चटपटे बेच्नेहरुलाई भुडीमा चक्कू तेस्र्याउँदै थैलाको रकम लुट्ने गरेको चटपटे व्यापारीहरुले बताएका छन् ।
सुरुमा आम ग्राहक जसरी नै चटपटे माग्ने त्यसपछि चटपटे बनाउन थालेपछि भुडीमा चक्कु तेस्र्याएर पैसा लुट्ने गरेको चटपटे व्यापारी श्याम चौधरीले बताए ।लुटेरा रातो रङ्गको एभेन्जरमा हेलमेट र मुखमा मास्क लगाएर आउने गरेको चौधरीले बताए । चौधरीको गत मंगलबार र शुक्रबार गरी ४५ सय रुपैया लुटेर लगेको बताएका छन् ।
चौधरीजस्ता झण्डै सातजना भन्दा बढी चटपटे व्यवसायीहरु लुटिएपछि सामूहिक रुपमा इलाका प्रहरी कार्यालय धरानमा निवेदन दिने तयारी गरेका छन् ।
