विराटनगर । पहाडी जिल्लाबाट अवैध रुपमा ल्याइएको अवैध गाँजा मोरङको कटहरी हुदै भारत तर्फ तस्करी गरेर लैजादै गरेको गाँजा प्रहरीले ट्रक सहित बरामद गरेको छ । प्रहरीले शनिबार राति बन्दाकोभी लोड गरिएको ट्रकबाट ३ हजार १ सय ५० किलो गाँजा बरामद गरेको छ ।
जिल्ला प्रहरी कार्यालय मोरङका अनुसार कटहरी गाउँपालिका–३ स्थित कटहर चोकमा राति साढे १२ बजेतिर चेकजाँच गर्दा को १ ख ४५१८ नम्बरको ट्रकमा लुकाइ राखिएको अवस्थामा गाँजा भेटिएको हो । जिल्ला प्रहरी कार्यालय मोरङका प्रवक्ता डीएसपी कोपिला चुँडालका अनुसार, ट्रकमा देखिनेगरी बन्दाकोभीका बोरा राखिए पनि ती बोरामुनि १ सय ५ वटा गाँजाका बोरा लुकाइएको फेला परेको हो। बरामद गाँजाको कुल तौल ३,१५० किलो रहेको छ। र ट्रक जाँचका क्रममा प्रहरी देखेपछि चालक फरार भएका छन् । फरार चालकको खोजी तीव्र पारिएको चुडालले जानकारी दिईन् ।
प्रारम्भिक अनुसन्धानमा पहाडी जिल्लाबाट ल्याएर भारत तर्फ तस्करी गर्न लागिएको हुनसक्ने आशंका प्रहरीले गरेको छ । यसअघि पनि मोरङ जिल्लामा ठूलो परिमाणमा गाँजा बरामद हुँदै आएको थियो। यस अघि असार २५ गते धनपालथान गाउँपालिका–१ मा ८०२ किलो गाँजा बरामद भएको थियो।
