विराटनगर बैशाख २३ ,
नेपाल उद्योग वाणिज्य महासंघको एशोसियट्सतर्फको निर्वाचनमा विराटनगरका व्यवसायी सुयास प्याकुरेल प्रभावशाली रूपमा कार्यकारिणी सदस्यमा निर्वाचित भएका छन्। ३३ प्रतिस्पर्धीमध्ये उत्कृष्ट १७ भित्र पर्न सफल उनले १,०६९ मत प्राप्त गर्दै आफ्नो सशक्त उपस्थिति देखाएका हुन्।
विराटनगरमै बसेर व्यवसायिक पहिचान बनाएका प्याकुरेल एमएम प्लास्टिक, सिटी सिनेमा जस्ता उद्यमसँग आबद्ध छन् भने नेपाल प्रिमियर लिगअन्तर्गत विराटनगर किंग्स टिमका मालिकका रूपमा पनि परिचित छन्। साथै, उनी उद्योग संगठन मोरङका पूर्व अध्यक्ष समेत भइसकेका छन्।
व्यवसाय, मनोरञ्जन, बैंक क्षेत्र र खेलकुद तीनै क्षेत्रमा सक्रिय प्याकुरेलको यो जितलाई विराटनगरका उद्यमीहरूको प्रतिनिधित्व र प्रभावका रूपमा समेत हेरिएको छ। महासंघभित्र अब उनको भूमिकाले निजी क्षेत्रका मुद्दा उठान र नीतिगत बहसमा थप ऊर्जा ल्याउने अपेक्षा गरिएको छ।
