विराटनगर । पहाडी भेगबाट विराटनगर हुँदै भारततर्फ लैजाँदै गरिएको प्रतिबन्धित गाँजा बोकेको स्कार्पियो गाडी शनिबार साँझ विराटनगरमा दुर्घटनामा परेको छ ।
विराटनगर महानगरपालिका–५ स्थित आयल निगम नजिकै प्रहरीको पिछा गर्ने क्रममा गाँजा बोकेको स्कार्पियो दुर्घटनामा परेको हो । गोप्य सूचनाका आधारमा प्रहरीले उक्त गाडीलाई पछ्याउने क्रममा दुर्घटना भएको जिल्ला प्रहरी कार्यालय मोरङले जनाएको छ ।
जिल्ला प्रहरी कार्यालय मोरङका प्रहरी प्रमुख एसपी कविता कट्वालका अनुसार दुर्घटनामा परेको स्कार्पियोबाट करिब ३९८ किलो प्रतिबन्धित गाँजा बरामद गरिएको छ ।
प्रहरीले गाँजा बोकेको गाडी र गाँजाको धनी पहिचान गर्ने तथा फरार चालकको खोजी कार्य तीव्र बनाएको एसपी कट्वालले जानकारी दिए । प्रहरीका अनुसार पहाडी भेगबाट विराटनगरको बाटो हुँदै भारततर्फ गाँजा तस्करी भइरहेको सूचनाका आधारमा निगरानी बढाइएको थियो ।
