धनकुटा । धनकुटाका बेसी तथा फाँटका कृषक यतिबेला चैते धान लगाउन व्यस्त छन् । तर कामदार अभाव, उन्नत जातको बिउ, प्रबिधि ज्ञान सिँचाइ सुबिधा अभावका कारण चैते धान उत्पादन गर्ने कृषक समस्यामा परेका छन् ।
धनकुटाको सागुरीगणि गाँउपालिका बडा नम्बर ६ सिम्सुवाका कृषक यतिबेला चैते धान लगाउन व्यस्त भएका छन् । तर यो गाँउमा चैत्रे धान खेति गर्ने कृषकको संख्या भने बर्षेनी घट्दै गएको छ ।
केही बर्ष अघिसम्म गाँउका ४० परिवार भन्दा बढीले चैते धानको खेती गर्ने गरेकोमा अहिले भने करीब १५ परिवारले मात्र चैतेधानको खेती गर्ने गरेका छन् ।
सिम्सुवा जस्तै जिल्लाका अन्य बेँसी तथा फाँटमा समेत अवस्था उस्तै छ । सिँचाइ सुबिधा, कामदार, पर्याप्त भएका ठाउँका कृषकलार्इ चैते धान लगाउन भ्यार्इनभ्यार्इ भए पनि बाँकी क्षेत्रको जमिन बाँझै रहने गरेको छ ।
यो वर्ष भने पानी समयमा नै परेपनि कामदार अभावका कारण अधिकांश खेत बाँझै राख्न बाध्य भएको सागुरीगणि गाँउपालिका बडा नम्बर ६ सिम्सुवाका कृषक उत्तर लिम्बु बताउँछन् ।
आघिल्लो आर्थिक वर्षमा १४२५ हेक्टर क्षेत्रफलवाट करीब ३७२० मेट्रीकटन चैते धान उत्पादन भएको थियो । यो बर्ष भने १५७५ हेक्टर क्षेत्रफलवाट ६०६४ मेट्रीक टन मात्र चैते धान उत्पादन भएको जिल्ला कृषि बिकास कार्यालय धनकुटाले जनाएको छ ।
सिँचाई सुबिधा, मौसम अनुकुल, मल बिउको सहज उपलब्धता तथा जिल्ला कृषी बिकास कार्यलय धनकुटाले बृहत्तर धान उत्पादन कार्यक्रम सञ्चालन गरेको कारण उत्पादन बढेको कार्यालयले जनाएको छ ।
जमिनको सदुपयोग गर्न सिँचाइ सुबिधा, उन्नत विउविजन, प्राबिधीक सहयोग भए चैते धानको उत्पादन र क्षेत्रफल बढ्ने सिम्सुवाका कृषक खेल बहादुर लिम्बुको भनाइ छ ।
जिल्लाको करिब २५ सय हेक्टर क्षेत्रफल चैतेधान उत्पादनको लागि योग्य भए पनि करीब ६० प्रतिशत क्षेत्रफलमा मात्र चैतेधानको खेती हुने गरेको जिल्ला कृषी विकास कार्यलयले जनाएको छ।(न्युज २४)
