खोटाङमा गायन प्रतियोगिता ‘भ्वाइस अफ खोटाङ’ हुने भएको छ । गाउँ–गाउँमा लुकेर रहेका गायनका प्रतिभाहरुको पहिचान, सम्बद्र्धन उद्देश्यले ‘भ्वाइस अफ खोटाङ’को आयोजना गरिएको आयोजक नेपाल राष्ट्रिय दलित समाज कल्याण संघले जनाएको छ ।
तीन चरणको अडिसनबाट छनोट गरिने प्रतियोगितामा प्रथम, दोस्रो र तेस्रो हुनेलाई
नगद पुरस्काका साथमा संगीत विद्यालयमा अध्ययन गर्ने र चलचित्रमा गीत गाउने अवसर समेत दिइने संघले बुधबार सदरमुकाम दिक्तेलमा पत्रकार सम्मेलन गरेर जानकारी दिएको छ ।
‘समतामुलक समाज निर्माणका लागि सांगीतिक अभियान’ भन्ने नाराका साथ गर्न लागिएको ‘भ्वाइस अफ खोटाङ’को पहिलो चरणको अडिसन मंसिर–२४ गते बाक्सिलाबाट सुरु गरेर पौष–१७ गते सदरमुकाम दिक्तेलमा समापन गरिने संघका सचिव दीपक ठटालले जानकारी दिए ।
बाक्सिलाबाट सुरु गरिने पहिलो चरणको अडिसन ऐसेलुखर्क, लामीडाँडा, हलेसी, बुइपा, मानेभञ्ज्याङ, सछितापोखरी, खोटाङबजारलगायतका ९ स्थानमा सञ्चालन गरिने छन् ।,सदरमुकाम बाहिर सञ्चालन गरिने पहिलो चरणको अडिसन सकिएपछि दोस्रो र तेस्रो अडिसन सदरमुकाम दिक्तेलमा गरिने आयोजकले जनाएको छ ।
