विराटनगरस्थित आरोहण गुरुकुलको सुशीला कोइराला नाटक घरमा ‘लखन पटवारी’ नाटक मञ्चन हुने भएको छ । साउन १ देखि १५ गतेसम्म हाटखोलास्थित नाटकघरमा सो नाटक मञ्चन हुन लागेको हो । 
लोककथालाई रंगकर्मी प्रविण खतिवडाले नाट्य रुपान्तरण र निर्देशन गरी तयार पारिएको नाटक ‘लखन पटवारी’मञ्चन हुन लागेको आयोजक आरोहण गुरुकुल विराटनगरका अध्यक्ष भैरव क्षेत्रीले जानकारी दिनुभयो । उक्त नाटक हालै इलाममा सम्पन्न राष्ट्रिय नाटक महोत्सवमा मञ्चन गरिएको थियो । प्रत्येक दिन साँझ ५ बजे मञ्चन गरिने नाटकको टिकट दर २००, ३०० र र ५०० तय गरिएको र विद्यार्थीका लागि ५० प्रतिशत छुटको व्यवस्था गरिएको आयोजकले जनाएको छ । नाटकको विषयवस्तु र कलाकारको अभिनय सशक्त भएकाले दर्शकले इलाममा सो नाटक अत्यन्तै मन पराएको निर्देशक खतिवडाले जानकारी दिनुभयो ।
