हे युवा ! छ तिमीमा उर्जा अथाह कति हो कति
देऊ उर्जा तिमी त्यो माटोले मागेको जति छ त्यति।
माटो भयो हेर ! सुख्खा शुविचार सिञ्चित नभए पछि
रुखो भयो माटो त्यो खनजोत् गोडमेल नभए पछि।
छैन बाली हेर ! लहलहाउदो उर्वरता सबै गुमे पछि
छैन मौसममा फल्ने अन्न हली बाउसे नभए पछि।
न त छन हेर ! कतै बियाडे खेतार रोपाहार हरु पनि
निर्जन झैँ भयो माटो भयो अब त्यो बेस्याहार बनी।
विरक्त नहोऊ हे युवा ! तिमी माटोको चित्कारलाई सुन
कस्सेर मुठ्ठी तिमी अहिले नै माटोको मुल्यलाई गुन।
लाएर दत्तचित्त हे युवा ! तिमी माटोका काँडाहरु चिन
गोडमेल गरेर यहाँ चाँडै तिमीले उत्तम बिजहरु बुन।
७ कार्तिक २०७५,विराटनगर।
