विराटनगर चैत २९,
विराटनगरका सबै वडामा अहिले विपन्न परिवारलाई राहत वितरणको काम भइरहेको छ । विराटनगरका आधा भन्दा बढी घरधुरीलाई राहत वितरण गर्न लागिएको तथ्यांकले देखाएको छ तर विराटनगरका स्थानीय विपन्न परिवार भने राहत पाइएन भनेर आक्रोशित छन् ।
विराटनगर १४ मा आज विहानदेखि राहत नपाएको विषयमा होहल्ला मच्चाएको थियो । यस्तै विराटनगर ११, १२ ,१९ मा पनि राहत नपाएको गुनासो आइनै रहेको छ ।
यतिमात्र होईन राहतको विषयमा विराटनगरमा जनप्रतिनिधिमाथि नै हातपातको घटना भएको छ । राहत नपाएको भन्दै वडा नम्बर ६ की वडा सदस्य सुशीला पासवानमाथि केही आक्रोशित जनताले हातपात समेत गरेको उनलेे बताएकी छिन् ।
उनका छोराका अनुसार उनिमाथि विहिवार साँझ केही स्थानीयले हातपात गरेका थिए । हातपात गर्नेलाई बिहीबार नियन्त्रणमा लिएर शुक्रबार छाडिएको प्रहरीले बताएको छ।
विराटनगरमा स्थानीय निकायले कुल घरधुरीको आधा राहतस्वरूप वितरण गरेपनि धेरैले राहत नपाएको गुनासोले कतै राहतको नाममा गलत व्यक्तिले फाइदा त उठाएको छैन ? भन्ने प्रश्न विराटनगरका बासिन्दाको मनमा उठ्ने गरेको छ ।
