विराटनगर जेठ २२ ।
विराटनगरको कोशी अस्पताल कोभिड–१९ उपचार केन्द्रबाट आज थप २७ जनाले कोरोना जितेर डिस्चार्ज भएका छन् ।
कोभिड १९ उपचार केन्द्रमा उपचाररत ४१ मध्ये २७ जनाले एकै पटक कोरोना जितेको कोशी अस्पताल विराटनगरकी मेडिकल सुपरीटेण्डेन्ट डाक्टर संगीता मिश्राले जानकारी दिईन । कोरोनामुक्त भएका मध्ये उदयपुरका ३, झापाका ७, मोरङका ६, सुनसरीका ४, सप्तरीका २ ,धनकुटाका ४, खोटाङका १ गरी जम्मा २७ जना डिस्चार्ज भएका छन् ।
उनीहरु मध्ये ४ जनामहिला र २३ जना पुरुष छन । कोशी अस्पताल कोभिड १९ उपचार केन्द्रका डाक्टर दीपक सिग्देलका अनुसार ३० जनाको परीक्षण गरिएको थियो ।
यो सँगै प्रदेश १ मा कोरोनामुक्त हुनेको संख्या ७५ पुगेको छ । यसअघि विपी कोइराला स्वास्थ्य विज्ञान प्रतिष्ठान धरानबाट १८ जना र विराटनगरबाट ३० जनाले कोरोना जितेका थिए । प्रदेश १ मा कोरोना संक्रमितको संख्या १८५ छ ।
