विराटनगर । मोरङमा सवारी दुर्घटना परि दुई जनाको मृत्यु भएको छ ।
शुक्रबार मोरङको ग्रामथान गाउँपालिका-१ को भित्री सडक हुँदै पूर्वबाट पश्चिमतर्फ जाँदै गरेको को २५ प ८५५९ नम्बरको मोटरसाइकल दुर्घटना हुँदा दुई युवकको मृत्यु भएको हो । जिल्ला प्रहरी कार्यालय मोरङका प्रहरी उपरीक्षक जनार्दन जिसीका अनुसार मोटरसाइकल दुर्घटना हुँदा कटहरी गाउँपालिका-५ का १६ वर्षीय आलोक विश्वास र ग्रामथान गाउँपालिका-१ का १८ वर्षीय रिसभ चौधरीको मृत्यु भएको छ ।
मोटरसाइकल विश्वासले चलाएका थिए । दुर्घटनामा गम्भीर घाइते उनीहरुलाई उपचारका लागि विराटनगर नर्सिङ होममा भर्ना गरिएको थियो । उपचारका क्रममा दुवैको मृत्यु भएको प्रहरीले जनाएको छ ।
