लगातार पहिलो दुई खेलमा विजय हासिल गरे पनि आइतबार भारतसँग फराकिलो हार बेहोरेपछि यु–२० साफ च्याम्पियनसिपमा नेपाली टोलीको फाइनल यात्रा कठिन मोडमा पुगेको छ । ‘गर या मर’को खेलमा नेपालले आज लिग चरणको अन्तिम खेलमा बंगलादेशसँग प्रतिस्पर्धा गर्दै छ ।
पाँच टोली सहभागी प्रतियोगितामा लिग चरणको शीर्ष दुई टोलीले फाइनलमा स्थान बनाउनेछ । तीन खेल सकिँदा बंगलादेश ९ अंकका साथ शीर्ष स्थानमा छ । तीन खेलबाट समान ६ अंक जोडेको भारत र नेपाल क्रमशः दोस्रो र तेस्रो स्थानमा छन् ।
आज नेपाललाई बंगलादेशविरुद्ध जितमात्र भएर पुग्दैन । फराकिलो अन्तरमा जित निकाल्नु आवश्यक छ । अन्यथा नेपालको यात्रा समूह चरणमै टुंगिनेछ । यद्यपि, माल्दिभ्सले भारतलाई हरायो भने नेपालले बंगलादेशसँग बराबरी गरेमात्र पनि पुग्नेछ ।
नेपालले भुवनेश्वरस्थित कालिंगा रंगशालामा नेपाली समयअनुसार दिउँसो ४ः१५ बजे खेल्नेछ । भारतले माल्दिभ्ससँग साँझ ७ः१५ बजे खेल्नेछ । त्यसकारण नेपालसँग भारत र माल्दिम्सबीचको खेल कुर्ने सुविधा छैन ।
बंगलादेश जारी प्रतियोगितामा अपराजित रहने एक्लो टोली हो । बंगलादेशले पहिलो खेलमै भारतलाई २–१ ले हराएको थियो । बंगलादेशले पहिलो खेलमा श्रीलंकालाई १–० ले हराएको थियो भने माल्दिभ्सलाई ४–१ ले हराएको थियो । नेपालले पहिलो खेलमा माल्दिभ्सलाई ४–० ले हराएको थियो भने दोस्रो खेलमा श्रीलंकालाई ३–० ले हराएको थियो ।
