श्रेयस ऐयरको अर्धशतक तथा रवी विश्नोईको चार विकेटप्रेरित भारतले आइतबार राति वेस्ट इन्डिजविरुद्धको पाँचौँ ट्वान्टी–२० अन्तर्राष्ट्रिय क्रिकेटमा ८८ रनको विजय हासिल गरेको छ । योसँगै पाँच खेलको ट्वान्टी–२० अन्तर्राष्ट्रिय शृंखलामा भारत ४–१ ले विजयी भएको छ ।
लाउडरहिलस्थित सेन्टर ब्रोवार्ड रिजनल पार्कमा भारतले टस जितेर ब्याटिङ गर्ने निर्णय गरेको थियो । पाहुना टोलीले निर्धारित २० ओभरमा सात विकेट गुमाएर १८८ रन बनाएको थियो ।
भारतका सबै स्पिनर मिलेर १० विकेट लिएपछि १८९ रनको लक्ष्य पछ्याएको वेस्ट इन्डिजले १५.४ ओभरमा १०० रन बनाउँदा सबै विकेट गुमायो । पुरुष ट्वान्टी–२० अन्तर्राष्ट्रिय क्रिकेटमा सबै १० विकेट स्पिन बलरले मात्र लिएको यो पहिलो खेल हो ।
यसअघि, एक इनिङमा स्पिनरहरूले बढीमा नौ विकेट मात्र लिन सकेका थिए । गएको जुनमा अष्ट्रियाका स्पिनरहरूले हंगेरीविरुद्ध नौ विकेट लिएका थिए ।
यस्तै, गत वर्षको ट्वान्टी–२० विश्वकपमा पनि अफगानिस्तानका स्पिनरहरूले स्कटल्यान्डविरुद्ध नौ विकेट लिन सफल भएका थिए ।
यद्यपि, महिला ट्वान्टी–२० अन्तर्राष्ट्रिय क्रिकेटमा भने यसअघि नै यो सम्भव भएको छ । सन् २०१९ मा थाइल्यान्डका स्पिनरहरूले मलेसियाविरुद्धको खेलमा सबै १० विकेट लिएका थिए ।
शृंखलामा वेस्ट इन्डिजले दोस्रो खेल पाँच विकेटले जित्नुबाहेक अरू खेल गुमायो । भारतले पहिलो खेल ६८ रनले जितेको थियो । तेस्रो खेलमा भारत सात विकेटले विजयी भएको थियो । चौथो खेल ५९ रनले जितेको भारतले पाँचौँ खेलमा ८८ रनको विजय हासिल गरेको हो ।
भारतका श्रेयस ऐयरले ४० बलमा आठ चौका र दुई छक्का प्रहार गर्दै ६४ रन बनाए । दीपक हुडाले ३८ रन जोड्दा कप्तान हार्दिक पाण्डेयले २८ रनको योगदान गरे । सञ्जु सामसनले १५, दिनेश कार्तिकले १२ र इशान किशनले ११ रन बनाए ।
वेस्ट इन्डिजका ओडेन स्मिथले तीन विकेट लिँदा हेडेन वालश, डोमिनिक ड्राकेस र जसोन होल्डरले एक/एक विकेट लिए ।
१८९ रनको लक्ष्य पछ्याएको घरेलु टोली वेस्ट इन्डिजका लागि शिमरन हेटमायरले ५६ रन बनाए । शमराह ब्रुक्सले १३ र डेभोन थोमसले १० रन जोडे ।
भारतका रवी विश्नोईले २.४ ओभरमा १६ रन दिएर चार विकेट लिए । कुलदीप यादवले चार ओभरमा एक मेडनसहित १२ रन दिएर तीन विकेट लिए । अक्षर पटेलले तीन ओभरमा एक मेडनसहित १५ रन दिएर तीन विकेट लिए ।
