स्पेनिस ला लिगाको क्लब बार्सिलोनाले सिजनपूर्वको मैत्रीपूर्ण फुटबल खेलमा आइतबार राति मेक्सिकोको क्लब पुमासविरुद्ध ६–० को फराकिलो जित निकाल्न सफल भएको छ ।
बार्सिलोनाले रोबर्ट लेवानडोस्कीको गोलबाट तेस्रो मिनेटमै अग्रता लिएको थियो । पाँचौँ मिनेटमा पेड्रीले बार्सिलोनाको अग्रता दोब्बर बनाए । औसमाने डेम्बेलेले दशौँ मिनेटमा तेस्रो गोल थपे । १९औँ मिनेटमा पेड्रीले व्यक्तिगत दोस्रो गोल गरे ।
पहिलो हाफमा ४–० को अग्रता लिन सफल बार्सिलोनाले दोस्रो हाफमा थप दुई गोल गरेको थियो । ४९औँ मिनेटमा पिइरे–इमेरिक औबमेयाङले गोल गरे । खेल सकिन ६ मिनेट बाँकी हुँदा फ्रांक डी जोङले अर्को गोल थपे ।
बार्सिलोनाले यही अगस्ट १३ मा रायो भायोकानोविरुद्धको खेलबाट स्पेनिस ला लिगाको सुरुआत गर्नेछ ।
