विराटनगर । विराटनगर–८ स्थित जि क्याफे एण्ड बिस्ट्रो का सञ्चालक र कर्मचारी विरुद्ध जिल्ला प्रहरी कार्यालय मोरङमा कर्तव्य ज्यानमा किटानी जाहेरी परेको छ । मासुको बक्यौता रकम उठाउन गत असार ३ गते आएका धनपालथान गाउँपालिका–४ कर्सियाका कासीद अन्सारीलाई कुटपिट गरेर सख्त घाईते बनाई अस्पतालमा भर्ना गराएको आरोप छ । उनको उपचारका क्रममा मृत्यु भएपछि पीडित परिवारले सञ्चालक र कर्मचारी विरुद्ध किटानी जाहेरी दर्ता गराएको हो ।
मृतक मोरङको धनपालथान गाउँपालिका ४ स्थित कर्सिया बजारमा चाँदनी फ्रेस हाउस सञ्चालन गर्दै आएका थिए । गत असार ३ गते क्याफेमा मासु दिए बापत ४० हजार पैसा उठाउन आएका अन्सारीलाई विराटनगर महानगरपालिका ८ मधुमाला निवासी गिरीश खतिवडा, क्याफेमा काम गर्ने जहादा गाउँपालिका ३ का करण राजवंशी र विराटनगर महानगरपालिका १६ बस्ने अनुराग राउतले कुटपिट गरेर सख्त घाईते बनाएको आरोप छ । उनको विराट नर्सिङ्ग होममा उपचारका क्रममा मृत्यु भएको छ ।
क्याफेका सञ्चालक गिरिस खतिवडा ¥यापर हुन् । मोरङ प्रहरीका प्रवक्ता रञ्जनकुमार दाहालले जाहेरी परेपछि अनुसन्धान भईरहेको बताएका छन् । जाहेरीमा गिरिश खतिवडा सहितका आरोपितहरु मिलेर सख्त घाइते बनाई अस्पताल भर्ना गरेपनि सोहि चोटको कारण कासिद अन्सारीको मृत्यु भएको भनिएको छ । मृतकका दाजु रासिद अन्सारीले वर्षौ देखि मासु पसल संचालन गर्दै आएका भाईको ‘जी क्याफे’ मा पनि कारोबार रहेको र घटना भएको दिन मासुको रकम उठाउन बोलाई सुनियोजित हत्या गरिएको आरोप जाहेरीमा लेखाएका छन् ।
प्रहरीले किटानी जाहेरी परेपनि प्रमाण फेला नपरेको भन्दै संलग्न आरोपी भनिएकाहरुलाई पक्राउ गरेको छैन । सञ्चालक खतिवडासहितले भने होटलको सीसामा ठोकिएर उनलाई चोट लागेपछि अस्पताल लगिएको अवस्थामा मृत्यु भएको दावी गर्दै आएका छन् । प्रहरीले घटना अनुसन्धानका लागि पोष्टमार्टम रिपोर्ट आवश्यक रहेको बताउँदै आएको छ । घटना हुँदाताका क्याफे भित्रको सिसी टिभी बन्द रहेको दावी गरिएपनि प्रहरीले यसको सुक्ष्म अनुसन्धान भने गरिरहेको छ ।
