-शारदा भट्टराई
सभ्यता मासियो द्वेष बढ्दै गयो !
व्यक्तिमा आसुरी भाव चढ्दै गयो !!
खिन्नता भिन्नता जम्न थाले झनैँ !
बुद्ध आऊ तिमी डुब्न लागे सबै !!१!!
व्यक्तिको सोचको तिक्त आभासले !
रुन्छ मान्छे सधैँ न्यायको अन्त्यले !!
चेतना वैलियो घामको साग झैँ !!
बुद्ध आऊ तिमी शान्ति जागोस् अझै !!२!!
धर्मको पालना प्रेमको भावना !
छैन कुण्ठा भयो शान्तिको चाहना !!
आस मार्दै छ रे शीतको भेलले !
बुद्ध आऊ तिमी कान्ति छाओस् भरे !!३!!
ज्ञानको खोजमा पन्थ गौँडा सबै !
खिन्नको बासमा बस्दछन् मौन झैँ !!
निभ्न लागे सबै व्यक्तिका माधुरी !
बुद्ध आऊ तिमी छर्न यो माधुरी !!४!!
शुद्धता मासियो स्वच्छता भासियो !
शिष्टता तर्सियो दुष्टता बर्सियो !!
बुद्ध बौद्धिकता बुझ्न बाँकी जहाँ !
बुद्ध आऊ तिमी ज्ञान ल्याऊ त्यहाँ !!५!!
