-दिपेन्द्र आचार्य
मुक्तक १
भाग्यमानी हुन्छन् जसको शिरमा आकाश हुन्छ
टेक्ने आफ्नै धर्ती अनि सास फेर्न बतास हुन्छ
विचारले मात्रै स्वभिमान साथ बाँच्ने भए मान्छे
आकाश धर्ती नभए लोकतन्त्रमा किन दास हुन्छ?
मुक्तक २
अँधेरी रातलाई जूनको साथ मीठो
एक्लो जीवनमा मायाको बात मीठो
दुखमा छाडी जाने एक्लो हातभन्दा
सङ्गै लड्खडाएको संघर्षको मात मीठो।।
मुक्तक ३
भक्तिमा पुजेको सत्कर्मको मन्दिर राम्रो
अरुको सम्मानमा झुकेको गुणी शिर राम्रो
अनिश्चित भविष्यमा निश्चित आउँछ मृत्यु
जीवन डुबाउने मुलभन्दा किनारा तिर राम्रो।।
मुक्तक ४
चिसो हुनु हिउँबाट सिक्नु
उम्रेर बड्नु बिउबाट सिक्नु
जल थल नभ सबमा छ ज्ञान
बाच्नु र मर्नु जिउबाट सिक्नु।।
पशुपति नगर(इलाम)
