विराटनगर । जिल्ला कारागार मोरङमा कैद सजाय भुक्तान गरिरहेका आर्यन मोहमद अहमद खान (मोहमद अहमद) कोशी अस्पतालबाट बिहीबार बिहान फरार भएका छन् ।
उपचारका लागि मंगलबार भर्ना भएका उनी बिहीबार बिहान निगरानीमा बसेका प्रहरीलाई धकेलेर फरार भएका हुन् ।
विराटनगर कारागारका निमित्त जेलर तुलसी पौडेलका अनुसार पेट दुख्ने समस्या भएपछि अहमदलाई कोशी अस्पताल भर्ना गरिएको थियो । बिहीबार बिहान सवा ५ बजे शाौचालय जाने क्रममा प्रहरीलाई धकेलेर उनी फरार भएका हुन् । विराटनगर महानगरपालिका–८ घर भएका अहमद जबरजस्ती करणी मुद्दामा दोषी ठहर भएका कैदी हुन् । जबरजस्ती करणी मुद्दामा मोरङ जिल्ला अदालतले २०७९ फागुन २९ गते १२ वर्ष कैद र ५ लाख जरिवानाको फैसला सुनाएको थियो ।
