काठमाडौं । साउन ३२ गतेदेखि पुनः प्रदर्शनको तयारीमा रहेको फिल्म ‘बुलाकी’को टे«लर सार्वजनिक भएको छ ।
सोमबार बानेश्वरस्थित आइप्लेक्स मलमा उक्त फिल्मको ट्रेलर सार्वजनिक भएको हो ।
लक्ष्मण सुनारले निर्देशन गरेको यो फिल्मलाई टोपेन्द्र विष्टले निर्माण गरेका हुन् । फिल्ममा सुरक्षा पन्त, नरेन खड्का र विराज विष्ट मुख्य भूमिकामा रहेका छन् । अर्जुन जिसीको सम्पादन र शिव ढकालले छायांकन गरेको फिल्म गत वर्ष प्रदर्शन भएको थियो । अन्य दुई फिल्म ’जारी’ र ‘बिहे पास’ सँग एकसाथ प्रदर्शनमा आएको थियो । प्रर्याप्त शो नपाएको भन्दै रिलिजको दोस्रो दिनमै फिल्मको प्रदर्शन स्थगित गरिएको थियो । अब यो फिल्म फेरि प्रदर्शनमा आउने निश्चित भएको हो ।
फिल्ममा सरस्वती खत्री, प्रकाश कंडेल, लक्ष्मी गिरी, सुशील पोखरेल, रमेश बुढाथोकी, कुलदिप अधिकारी, झलनाथ खत्री, उपसना नेम्वाङ, सोनु सेढाईलगायत कलाकारहरु पनि रहेका छन् ।
