-नवराज पोखरेल 'नवशिला'
मुक्तक १
सेतो चाँदी पहेलो सुन कसले मिसाएछ
आकासमा तारा र जून कसले मिसाएछ
बैगुनी थ्यो बैगुनी हो बैगुनीनै भन्छु सधैँ,
जान्ने भई बैगुनमा गुन कसले मिसाएछ?
मुक्तक २
कहिँ मुक्तक कहिँ गजल कहिँ गीत बनुँ
सुर भरेर मिठास छरि प्रेमिल रित बनुँ
शव्द भाव सजाउन सृजनाको चट्टान,
पगालेर नरम तरल शिलाजीत बनुँ।
मुक्तक ३
स्नेहले भरि हरदम खुसी हुन पाइयोस्
दुख पीर ब्यथालाई सधैँ धुन पाइयोस्
रिष राग द्वैष केल्श नहोस् यो मनभित्र,
सफलता भेट्ने त्यो लक्ष्य छुन पाइयोस्।
मुक्तक ४
मेरो प्राण भन्थेउ मलाई गयौ आज टाढा
बाचा कसम सबै ढलाई गयौ आज टाढा
देखावटी रैछ तिम्रो खेल बिश्वासघातको,
मेरो भरोषालाई जलाई गयौ आज टाढा।
बेलबारी -२, नवदेव मार्ग, लालभित्ती, मोरङ
