-नवराज कट्टेल
जल्ने र बल्नेहरु
अन्तर हुन्छन् नियन्त्रणका
जल्नेहरु उग्रको उज्यालोमा
खरानी फलाएर निब्दछन्
बल्नेहरु सुस्तरी दियो झैं
मुहार खुलाएर बाँच्दछन् ।
फगत जलेर दिएको उज्यालो
नजिक बन्छ अन्धकार
बलेर दिएको उज्यालो
समीप देखिन्छ अनुहार ।
जल्ने आफैं डुब्दछ उत्पातमा
तिम्रो लालची प्यासले
धुप अभावमा निभेपनि
सुगन्ध छर्दछ दियोले ।
फरक,
जलेर देखिएका तिमी
केहिपछि हराउँछौं
बलेर देखिएका हामी
फर्केर त्यसलाई सम्हाल्छौं ।
किन ?
जलेको बगाउने खर्च
खोलो त्यो जरुरी थियो
बलेर देखाउँन बत्ती
दियोको मजदुरी थियो ।
निर्वाचन दृष्य.....
दनदन नोटको तातो
सेकाएर हत्केला
खिचिएका तिम्रा औंला
स्वतन्त्रता सकिएला ।।
