विराटनगर । विराटनगर महानगरपालिका–१४ जतुवाका दुईघरबाट प्रहरीले ४५ किलोग्राम गाँजा बरामद गरेको छ । लुकाएर राखेको गाँजा बरामद भएपछि घरधनीलाई समेत नियन्त्रणमा लिइएको छ ।
प्रहरीले विराटनगर–१४ जतुवाका १९ वर्षीय भूपेन यादव र ६० वर्षीय छटु यादवको घरबाट सोमबार बिहान गाँजा बरामद गरेको हो । उनीहरुको घरमा गाँजा रहेको सुचना पाएपछि प्रहरीले छापा हानेको थियो । त्यस क्रममा भूपेनको घरमा ३० र छटुको घरमा १५ किलोग्राम गाँजा फेला परेको हो ।
मोरङका प्रहरी नायव उपरीक्षक बेदप्रकाश जोशीले प्याक गरेर झोलामा राखिएको गाँजा बरामद गरिएको जानकारी दिएका छन् । गाँजा बरामद भएपछि दुईजनालाई नियन्त्रणमा लिएर अनुसन्धान भईरहेको बताइएको छ । पक्राउ परेकाहरुविरुद्ध लागुऔषध ऐनअन्तर्गतको मुद्दा चलाउन अदालतबाट म्याद थप गरेर अनुसन्धान थालिएको छ ।
