वासिङ्टन । संसारका सबैभन्दा धनी व्यक्ति र डोनाल्ड ट्रम्पका पूर्व सल्लाहकार एलन मस्कले बुधबार गत हप्ता दुवैबीच सार्वजनिक मतभेदपछि अमेरिकी राष्ट्रपतिका लागि आफ्ना हालका केही आलोचनामा पछुतो गरेको बताउनुभएको छ ।
“गत हप्ता राष्ट्रपति डोनाल्ड ट्रम्पका बारेमा मैले गरेको केही पोस्टप्रति मलाई खेद छ । तिनीहरू धेरै बढी गए”, मस्कले आफ्नो सामाजिक सञ्जाल एक्समा लेख्नुभयो ।
मस्कको पछुतोको अभिव्यक्ति ट्रम्पले टेक अर्बपतिलाई विवादास्पद खर्च विधेयकको पक्षमा मतदान गर्ने रिपब्लिकनहरूलाई सजाय दिन खोजे ‘गम्भीर परिणाम’ भोग्नुपर्ने धम्की दिएको केही दिनपछि आएको हो ।
मुख्यतः गत बिहीबार जनताको अगाडि सामाजिक सञ्जालमा भएको उहाँहरूको कटुतापूर्ण बिछोड मस्कले ट्रम्पको तथाकथित ‘ठूलो, सुन्दर’ खर्च विधेयकको कडा आलोचना गरेपछि सुरु भएको थियो । उक्त विधेयक हाल कांग्रेसमा छ ।
गत वर्षको राष्ट्रपति चुनावमा रिपब्लिकन पार्टीका सबैभन्दा ठूला वित्तीय समर्थकहरू मध्ये एक मस्कलाई विधेयकको विरोध गर्ने केही सांसदले कानूनको पक्षमा मतदान गर्ने रिपब्लिकनहरू विरुद्धको प्राथमिक चुनौतीहरूलाई आर्थिक सहयोग गर्न आह्वान गरेका थिए ।
“यदि उहाँले त्यसो गर्नुभयो भने उहाँले धेरै गम्भीर परिणाम भोग्नुपर्नेछ”, ट्रम्पले शनिबार एनबिसी न्युजलाई भन्नुभयो । उहाँले मस्कलाई ‘अनादरकारी’ पनि भन्नुभएको थियो । ट्रम्पले ती परिणाम के हुनेछन् भनेर निर्दिष्ट गर्नुभएन । रासस/एएफपी
फोटो:फाइल
