विराटनगर । बैंकमा बचत गर्न लैजादै गरेको अवस्थामा ३ लाख ६७ हजार रकम लुटपाट गरेको आरोपमा प्रहरीले दुईजनालाई पक्राउ गरेको छ । प्रहरी भन्दै उनीहरुले विराटनगर–१५ का बिक्रमकुमार साह तेलीबाट रकम लुटपाट गरेका थिए ।
लुटपाट गर्ने २४ वर्षीय समिर हुसेन र २७ वर्षीय आशिक अन्सारीलाई प्रहरीले आइतबार विराटनगर १७ बाट पक्राउ गरेको हो । प्रहरीले बैंकमा राख्न लगेको भनिएको रकम समेत हुण्डिमार्फत ल्याउँदै गरेको स्थानीयको भनाई छ ।
मोरङका प्रवक्ता कोपिला चुडालका अनुसार प्रहरी हुँ भन्दै लुटपाट गर्ने उनीहरु विरुद्ध जाहेरी लिने र कानुनी अनुसन्धानको प्रक्रियामा जाने तयारी भइरहेको छ । प्रहरीले विस्तृत जानकारी सोमबार सार्वजानिक गर्ने तयारी समेत गरिरहेको छ ।
