विराटनगर । विराटनगरमा सरकारको संयन्त्रले काम गर्न नसक्दा लकडाउन प्रभावकारी बन्न सकेको छैन ।
विराटनगर महानगरपालिकाले शुरुका दिनमा नै लकडाउन गर्ने भनेर निर्णय गरेर कडाई थाल्ने जनाएको भएपनि लकडाउन शुरु भएको एक महिना २ दिन पुग्दा समेत त्यसको पुर्ण पालना हुन नसकेको हो । स्थानीय सरकारले त ब्यवस्थापनको लागि कुनै पहल नै नगरेको आरोप लाग्दै आएको छ । आन्नरिक रुपमा वडा तहबाट हुनु पर्ने काम समेत नभएको स्थानीयले बताएका छन् ।
कोरोनाको बारेमा सचेत नागरिक भने कुनै भिडभाड नभए हुन्थ्यो भन्नेमा देखिएका छन् भने तरकारी खरिद बिक्रीको लागि बजारमा हाट बजार जस्तै भिड लाग्ने गरेको छ । 
बिराटनगर महानगरपालिका वडा नम्बर ६ को शान्तिचोकमा शुुक्रवार बिहानै हाट बजारको जस्तो भिड लागेको थियो । अन्य दिन झै बिहानै तरकारी किन्ने र बेच्नेको उस्तै भिडभाडले गर्दा कोरोनाको संक्रमणको त्रास बढ्ने स्थानीय बताउँछन् ।
शान्तिचोकमा मात्र हैन अन्य क्षेत्रमा पनि यस्तै भिड रहेको बिराटनगरका रामकृष्ण सिंहले बताउनुभयो ।
‘यस्ता प्रबृतिका ब्यत्तिःलाई प्रहरीले भाटा हान्नु पर्ने रहेछ, बिराटनगरका गुणराज रिजालले भन्नुभयो, प्रहरीले हरेक दिन माईकिंग गरेर बाहिर ननिस्कन भनेको छ, यस्ता चरित्र भएका ब्यक्तिले आफु सहित अरुलाई पनि खतरामा पारेका छन् ।’
केहीदिन अगाडी बिराटनगरको बसपार्क पस्चिममा रहेको नयाँ निर्माण भएको गुद्री बजारमा पनि सयौँको संख्यामा सर्बसाधारणको भिड लागेपछि प्रशासनले बन्द गराएको थियो ।
