विराटनगर बैशाख १२ ,
बिराटनगरमा रहेका यौनिक तथा लैङ्गिक अल्पसङ्ख्यक समुदायलाई लकडाउनले समस्यामा परेपछि विराटनगरका युवाहरुको समुहले सहयोग हस्तान्तरण गरेको छ । विराटनगर वडा नम्बर १ जिल्ला प्रहरी कार्यालय छेउमा बसोबास गर्ने १९ जनालाई राहत उपलब्ध गराइएको हो ।
लकडाउनले उनीहरुको दिनचर्या तथा गरिरहेको बिभिन्न काममा असर पुगेपछि राहत नपाएर बसेको अवस्थामा विराटनगरका युवा समाजसेवीको समुहले आज उनीहरुलाई राहत स्वरूप चामल , दाल , आलु , नुन , तेल लगायतका खाद्यान्न सामग्री उपलब्ध गराएको अभियन्ता पेरिस सुबेदीले बताए ।
उक्त राहतका लागि स्थानीय दिपक चापागाईं,हरि बजगाईं ,भवेश पौडेल,अजय शर्मा ,विजय सास्वत,विजय शर्मा र सजल मोनीले सहयोग गरेको सुबेदीले बताए । दुख पाएर धेरैले नहेरेको समुदायलाई सहयोग गर्न पाउदा खुसी लागेको र आगामी दिनमा पनि सहयोग जारी राख्ने अभियन्ता दिपक चापागाईंले बताए ।
नागरिकता बिना स्थानीय निकायले राहत नदिएको गुनासो :
सरकारले लकडाउनको कारण समस्यामा परेका बिपन्न तथा गरिबहरुको लागि राहत वितरण गरेको भएपनि यौनिक तथा लैङ्गिक अल्पसङ्ख्यक समुदायले स्थानीय सरकारबाट राहत नपाएको बताएका छन् । नागरिकता नभएको कारण यौनिक तथा लैङ्गिक अल्पसङ्ख्यक समुदायलाई राहत नदिएको सल्मा बेगमले गुनासो गरिन ।
यौनिक तथा लैङ्गिक अल्पसङ्ख्यक समुदायलाई नागरिकता प्रदान नभएको कारण राहत लिन नपाएको उनको गुनासो छ ।
