विराटनगर । उदयपुरको बेलका नगरपालिका वडा ८ सिरुवानीवाट ठुलो परिणामको नियन्त्रीत लागुऔषध गाँजा सहित ३ जनालाई प्रहरीले पक्राउ गरेको छ ।
लागुऔषध गाँजाको ओसार पसार तथा कारोवाट भईरहेको भन्ने बिशेष सूचनाको आधारमा ईलाका प्रहरी कार्यालय रामपुर ठोक्सिलाबाट खटिएको प्रहरी टोलीले बिहिबार बिहान करिब २ बजे ४ सय के.जी. गाँजा सहित ३ जनालाई पक्राउ गरेको हो ।
पक्राउ पर्नेहरुमा बेलका नगरपालिका वडा ८ बस्ने २७ बर्षीय गोकुल राई, बेलका नगरपालिका वडा ७ बस्ने २९ बर्षीय मनोज राई र बराहक्षेत्र नगरपालिका वडा १ सुनसरीका २३ बर्षीय मनिष धामी रहेका छन् । उनीहरुलाई को.१ ज २७६१ नम्बरको पिकअपमा गाँजा ओसार पसार गरिरहेको अवस्थामा पिकअप सहित पक्राउ गरिएको हो ।
उनिहरुको साथबाट प्रहरीले नगद ६३,०२५ ।-(त्रिसठ्ठी हजार पचिस रुपैँया) समेत बरामद गरेको छ । गाँजा सहित पक्राउ परेका उनीहरुको घटना बारेमा प्रहरीले थप अनुसन्धान गरिरहेको जनाएको छ ।
