काठमाडौं । फाल्गुन कृष्ण चतुर्दशीका अवसरमा आज देशभर महाशिवरात्रि पर्व श्रद्धा र भक्तिपूर्वक मनाइँदैछ । धार्मिक परम्पराअनुसार मध्यरातमा चतुर्दशी तिथि परेकै दिन भगवान् शिवको पूजा, आराधना र व्रत बस्ने चलन रहेकाले देशभरका शिवालयहरूमा भक्तजनको ठूलो भीड लागेको छ ।
सबैभन्दा बढी भीड पशुपतिनाथ मन्दिर क्षेत्रमा देखिएको छ । बिहानैदेखि दर्शनार्थी, साधुसन्त र तीर्थयात्रीहरूको चहलपहल बढेको छ भने छिमेकी देश भारतबाट समेत हजारौँ भक्तजन यहाँ आएका छन् ।
धार्मिक मान्यताअनुसार यस दिन व्रत, उपवास, रातभर जाग्राम गरी शिवजीलाई दूध, बेलपत्र र धतुरो अर्पण गरे सुख–शान्ति तथा मोक्ष प्राप्त हुने विश्वास रहेको छ।
महाशिवरात्रिका अवसरमा आज बिहान २ बजेदेखि पशुपतिका चारै ढोका खोलिएका छन्। दर्शनार्थीको सुविधाका लागि तीन बाहिरी र एक भित्री लाइनको व्यवस्था गरिएको छ। सवारी पार्किङ सिफल, तिलगङ्गा, गुह्येश्वरी लगायत स्थानमा मिलाइएको छ ।
त्यस्तै, तीन वर्षअघिदेखि पशुपति क्षेत्रमा गाँजा, भाङ, धतुरोलगायत लागुपदार्थ निषेध गरिएको छ ।
आज पशुपतिनाथसँगै गोकर्णेश्वर मन्दिर, डोलेश्वर महादेव मन्दिर लगायत उपत्यकाका शिवालयमा पनि भक्तजनको उल्लेख्य भीड लागेको छ । राजधानी बाहिरका विभिन्न शिव मन्दिरहरूमा समेत धूमधामका साथ पूजाआराधना भइरहेको छ।
