विराटनगर । सशस्त्र प्रहरी बल नेपाल सीमा सुरक्षा गुल्म रानीको टोलिले विराटनगर–१७ मटेर्वाका दुई घरबाट ४१ बोरा मटर तथा चनाको दाल बरामद गरेको छ । सीमा सुरक्षा गुल्म रानीका सशस्त्र प्रहरी नायव उपरीक्षक सुर्य प्रकाश शर्माको कमाण्डमा खटिएको ३० जनाको टोलिले शुक्रबार बिहान मटेर्वाका मो.मुन्ना मियाँको घरबाट ११ बोरा केराउ र अंगुरी खातुनको घरबाट २५ बोरा चनाको दाल तथा पाँच बोरा केराउ नियन्त्रणमा लिएर भन्सार बुझाउने प्रक्रिया थालेको हो ।
प्रहरीले नियन्त्रणमा लिइएको सामान भने मुन्ना मियाँका भिनाजु गुडडु मियाँको भएको स्थानीय एक जानकारले बताएका छन् । गुड्डु मियाँको सामान मटेर्वामा रहेका घरघरमा ल्याएर राखेपछि विस्तारै विराटनगरको बजारसम्म ल्याउने गरिएको छ । यहि नाकाबाट सवनम–सुरेशको सामान समेत आउने गरेको छ ।
भारतबाट अवैध रुपमा सामान भित्रिएको सूचना पाउना साथ सशस्त्र प्रहरी बलको टोलि त्यहाँ पुगेको थियो । त्यसपछि घर खानतलासी गर्दा चनाको दाल र केराउ बरामद भएको थियो ।
