प्रेम देवान
विराटनगर, १० साउन । विराटनगर १५ मलाय रोडमा लहरीको ठक्करबाट मोटरसाइकल चालकको मृत्युपछि एक दर्जन बढी सवारी साधन तोडफोड भएका छन् ।
भारतबाट आद्योगिक कच्चा पदार्थ बोकेर आएको लहरीको ठक्करबाट विराटनगर १५ निवासी अमर सिहको मृत्यु भएपछि स्थानियबासासीले बिहीबार साँझ एक दर्जन बढी ठूला माल वहाक ट्रकहरुमा तोडफोड गरेका हुन् । साथै उनीहरुले टायर बालेर विरोध प्रर्दशन समेत गरेका थिए । 
घटनाको विरोधमा प्रदर्शन र तोडफोड हुन थालेपछि सो क्षेत्रको अवस्था असामान्य बनेको थियो । २ वटा नेपाली नम्बर प्लेटको गाडी र १० वटा भारतिय नम्बर प्लेटको गाडीमा क्षति पुर्याएका थिए ।
स्थानियवासीले जोगवनी विराटनगर सडक खण्डमा टायर बालेर प्रदर्शन गरेपछि सवारी साधन पुर्ण रुपमा ठप्प बनेको थियो । घटनाको विरोधमा सुरु भएको नारावाजी र प्रदर्शनले उग्ररुप लिएसँगै सवारी साधन पनि सञ्चालन हुन सकेका थिएनन् । मोरङ प्रहरीले घटनास्थलमा ठूलो संख्यामा सशस्त्र र नेपाल प्रहरी समेत परिचालन गरिएको छ ।
भारतिया नम्बरको एन एल ०१ डी ३६९० नम्बरको लहरीले बीआर ३८ आर ३२१३ नम्बरको मोटरसाइकललाई ठक्कर दिंदा अमर सिंहको घटनास्थलमै मृत्यु भएको थियो ।
